Rregullat e agjërimit 3

Tema e tretë :gjërat e pëlqyera dhe të papëlqyera në agjërim.

Në këtë temë do të trajtojmë dy çështje

Çështja e parë :gjërat e pëlqyeshme të agjërimit.

Agjëruesi duhet të ketë parasysh gjërat e mëposhtme:

1. Ngrënien e syfyrit, sepse profeti salallahu alejhi ue selem ka thënë :"hani syfyr sepse syfyri ka bereqet". Transmeton Buhariu, nr. 1923 dhe Muslimi, nr. 1095. Syfyr quhet kur ha shumë ose pak, madje edhe duke pirë një gllënkë ujë. Koha e syfyrit është që nga mesi i natës deri në hyrjen e agimit .

2. Vonimi i syfyrit. Transmeton Zejd Ibn Thabit (radiallahu anhu) :” Hëngrëm syfyr me profetin salallahu alejhi ue selem e më pas u ngritëm për tu falur ( sabahun). Sa kohë kishte ndërmjet tyre ( syfyrit dhe namazit të sabahut), -e pyetën profetin salallahu alejhi ue selem. - Sa për të kënduar 50 ajete, -tha ai." Transmeton Buhariu, nr. 575 dhe Muslimi, nr. 1097. Ky është teksti i Muslimit.

3. Është i pëlqyer shpejtimi i iftarit menjëherë, sa të sigurohet se ka perënduar dielli. Transmeton Sehl Ibn Sa'd se profeti ka thënë :” Do jenë njerëzit në mirësi përderisa e shpejtojnë iftarin. " Transmeton Buhariu, nr. 1957 dhe Muslimi, nr. 1098

4. Çelja e iftarit me hurma arabe e nëse nuk ka atëherë me ujë. Transmeton Enesi( radiallahu anhu) se :"Profeti salallahu alejhi ue selem e çilte iftarin me disa kokrra hurma të freskëta arabe, nëse nuk kishte çilte me të vjetra dhe nëse nuk kishte çilte me ujë". Transmeton Ebu Daudi, nr. 2356 ; Tirmidhiu, nr. 696 dhe e saktësoi Begauiu në librin sherh Es-suneh. Gjithashtu e saktësoi Albani në librin “Saktësimi i librit të Tirmidhiut”, nr. 560. E nëse nuk gjen gjë për të çelur iftarin bën njet për ta çelur dhe mjafton.

5. Lutja në kohën e iftarit dhe gjatë agjërimit, sepse profeti salallahu alejhi ue selem ka thënë :" Tre personave nuk u kthehet lutja mbrapë : agjëruesit , prijësit të drejtë , dhe atij që i kanë bërë padrejtësi. " Transmeton Tirmidhiu, nr. 2526; por Bejhekiu, 3/345 e të tjerë kanë transmetuar nga Enesi se profeti salallahu alejhi ue selem ka thënë : Tre lutje nuk kthehen mbrapë : lutja e prindit , lutja e agjëruesit dhe lutja e udhëtarit". E saktësoi Albani Silsiletu sahihah, nr. 1797

6. Të japësh sa më shumë sadaka , të lexosh Kur'an, t’u japësh iftar agjëruesve e të gjitha punët e mira : Transmetohet nga Ibn Abbasi se ka thënë: Profeti salallahu alejhi ue selem ishte njeriu më bujar dhe më shumë se kurrë në Ramazan, kur e takonte Xhibrili. Ai e takone në çdo natë të Ramazanit dhe i mësonte (profetit salallahu alejhi ue selem) Kur'anin. Kështu profeti salallahu alejhi ue selem kur e takonte Xhibrili ishte më i shpejtë në bujari se era". Transmeton Buhariu, nr. 6 dhe Muslimi, nr. 2308

7. Është e pëlqyeshme që njeriu të falet sa më shumë natën sidomos dhjetë ditët e fundit të Ramazanit. Transmetohet nga Aishja radiallahu anha se ka thënë :" Kur hynte dhjetë ditëshi i fundit profeti salallahu alejhi ue selem shtrëngonte izarin dhe nuk flinte natën (falej), por zgjonte edhe familjen e tij. Transmeton Buhariu, nr. 2024 dhe Muslimi, nr. 1174. Gjithashtu ka thënë profeti salallahu alejhi ue selem :” Kush falet në muajin e Ramazanit me besim dhe duke shpresuar shpërblim i falen gjynahet e mëparshme". Transmeton Muslim, nr.759

8. Umra, sepse profeti salallahu alejhi ue selem ka thënë :"Një umre në Ramazan është e barabartë me një haxh." Transmeton Buhariu, nr. 1782 dhe Muslimi, nr. 1256

9. Është e pëlqyeshme të thuash : jam me agjërim, kur dikush të ofendon. Profeti salallahu alejhi ue selem ka thënë :"Kur dikush prej jush është në agjërim të mos thotë fjalë të këqija, as të mos bërtasë e nëse dikush e ofendon, ose e lufton t’i thotë : unë jam duke agjëruar". Transmeton Buhariu, nr. 1904 dhe Muslimi, nr. 1151. Ky është teksti i Buhariut.

Çështja e dytë : Gjërat e papëlqyeshme në agjërim

Disa gjëra janë të papëlqyeshme për agjëruesin, pasi mund ta çojnë në cënimin e agjërimit të tij dhe pakësimin e shpërblimit. Ato janë si vijon :

1. Futja e ujit në gojë dhe hundë në maksimum, sepse mund të çojë në hyrjen e ujit në brendësi të trupit . Profeti salallahu alejhi ue selem ka thënë :" Thithe ujin (me hundë) deri në maksimum, vetëm nëse je agjërues (mos e vepro këtë)." Transmeton Tirmidhiu, nr. 788 dhe e saktësoi; Nesaiu, nr. 1/66; Ibn Maxheh, nr. 407 dhe e saktësoi Albani në librin Es Sihahu; Nesai, nr. 85.

2. Puthja e gruas me epsh dhe nuk është i sigurtë për vetëpërmbajtje. Kështu që është e papëlqyeshme puthja e gruas për agjëruesin, sepse mund ta çojë në ndezjen e epshit dhe mandej drejt prishjes së agjërimit me anë të daljes së spermës, ose duke përfunduar në mardhëniet seksuale. Nëse është i sigurtë në vetvete që nuk i prishet agjërimi, nuk është problem, sepse profeti salallahu alejhi ue selem puthte edhe pse ishte në agjërim. - Por ai ishte njeriu më i përmbajtur, - thotë Aishja radiallahu anha. Transmeton Buhariu, nr. 1927 , dhe Muslimi, nr. 1106). Gjithashtu duhet të largohet nga çdo gjë që nxit epshin , si : shikimi i vazhdueshëm tek gruaja, apo mendimi rreth mardhënieve seksuale, sepse këto gjëra mund ta çojnë njeriun deri në gjendje ejakulimi ose marrdhënie seksuale.

3. Gëlltitja e sekrecioneve të hundës, sepse shkojnë në brendësi të trupit dhe i japin atij fuqi, shto këtu edhe qenien e tyre të neveritshme dhe të dëmshme.

4. Provimi i ushqimit pa pasur nevojë , por nëse është e nevojshme , është guzhinier, nuk është problem me kusht që të mos shkojë deri në fyt.





Përgatiti një grup dijetarësh në Medinen Muneuereh pranë shtëpisë botuese të Kur'anit



Përktheu Abdurrahim Balla

www.teuhidi.com